Penodi Emyr Afan yn Ddirprwy Gadeirydd TAC
4 March 2022
Mae TAC – Teledwyr Annibynnol Cymru yn falch iawn o gyhoeddi bod Emyr Afan wedi’i benodi’n Ddirprwy Gadeirydd TAC yn dilyn cyfarfod o’r Cyngor yr wythnos diwethaf. Emyr Afan yw Prif Swyddog Gweithredol y cwmni cynhyrchu teledu Avanti Media ac mae wedi ennill nifer fawr o wobrau gan BAFTA ac eraill, am ei raglenni.
Mae Emyr wedi bod yn aelod o Gyngor TAC ers blynyddoedd maith ac mae ei gyfraniad wedi bod yn holl bwysig wrth gynrychioli cwmnïau cynhyrchu annibynnol a’r sector yng Nghymru.
Dywedodd Dyfrig Davies, Cadeirydd TAC: “Rwyf yn hynod o falch bod Emyr wedi cytuno i ymgymryd â’r rôl. Bydd ei brofiad helaeth a’i allu naturiol wrth arwain a chyfathrebu yn gaffaeliad i TAC. Rydym yn adeiladu ar dîm newydd ar adeg cyffroes a heriol o fewn y sector ac rwy’n edrych ymlaen yn fawr at gyd-weithio yn agosach ag ef.”
Dywedodd Emyr Afan, Dirprwy Gadeirydd TAC: “Hoffwn ddiolch i Dyfrig am y croeso a’i gefnogaeth i mi ac rwy’n falch iawn o gael derbyn y swydd. Mae TAC wedi gweithredu ar lwybr cadarn ar hyd y blynyddoedd i fod yn llais cryf. Rwy’n teimlo yn fy nghalon ein bod yn dod tuag at gyfnod allweddol ym myd y cyfryngau a darlledu, ac rwy’n edrych ymlaen at fod o gymorth ymarferol wrth gefnogi Dyfrig a’r tîm.”
Ychwanegodd Dyfrig Davies, Cadeirydd TAC: “Mae gan TAC lawer o gynlluniau ar y gweill yn cynnwys adeiladu ar ein rhaglen hyfforddiant, ymateb i strategaeth newydd S4C, gweithio gyda Llywodraeth y DU a Llywodraeth Cymru ar faterion polisi allweddol a chyd-weithio gyda’n darlledwyr. Mae’n rhaid sicrhau sector greadigol ffyniannus a llwyddiannus a bydd arbenigedd Emyr yn ein cynorthwyo i wneud hyn wrth symud ymlaen.”
Cysylltu â ni
Sioned Haf Roberts – Rheolydd Cyffredinol
Sioned Harries – Swyddog Gweinyddol
Rhif ffôn: 07443 276 977
Ebost: sioned.harries@tac.cymru
Cyfeiriad
TAC
Rondo Media
Llawr 9
Southgate House
Wood Street
Caerdydd
CF10 1EW